Opozita ankesë për komisionet, deputetët demokratë largohen nga mbledhjet

Mbledhjet e Komisioneve Parlamentare këtë të mërkurë nuk janë zhvilluar në një atmosferë normale.

Përjashtimi i deputetëve të opozitës nga seancat plenare, rrëzimi i Komisioneve Hetimore dhe bllokimi i Reformës Zgjedhore, por edhe moskonsiderimi i asnjë nisme ligjore ka bërë që deputetët e Partisë Demokratike të debatojnë ashpër në Komisionet Parlamentare dhe të braktisin mbledhjen.

Mbledhja e Komisionit të Veprimtarisë Prodhuese u shty për më shumë se një orë për shkak të mungesës së deputetëve opozitarë.

Në Komisionin e Ligjeve deputetët e opozitës, pasi kanë dëgjuar propozimin e Jorida Tabaku, për ligjin e prokurimeve, nismë që u rrëzua nga mazhoranca, debatuan me socialistët, e më pas braktisën mbledhjen.

Rrëzimin e propozimeve dhe moskonsiderimin e asnjë nisme, deputetët demokratë e  kanë konsideruar si mbyllje të rrugës institucionale për opozitën në Kuvend. Vendimmarrja për të ashpërsuar gjuhën në Kuvend dhe për të nisur një formë radikalizmi parlamentar u mor gjatë mbledhjes së përbashkët të deputetëve të opozitës ditën e martë. Në javët e fundit Berisha ka paralajmëruar disa herë edhe protesta të mundshme, por pa nxjerrë asnjë datë konkrete ende.

LEXONI GJITHASHTU:

• “S’mund të ketë normalitet”/ PD debate në komisionet parlamentare
• Berisha: Opozita defakto është përjashtuar nga parlamenti