Orban takon Dodik, kryeministri anti-BE dhe lideri separatist forcojnë bashkëpunimin

Hungaria dhe Republika Serbe e Bosnjës do të punojnë për ta ngritur bashkëpunimin dypalësh në një nivel të ri, pa e bërë këtë në dëm të ndonjë pale të tretë.

Ka qenë ky rezultati i takimit kokë më kokë të zhvilluar mes kryeministrit hungarez Viktor Orban dhe liderit të sanksionuar të serbëve të Bosnjës, Milorad Dodik, të premten në Banja Llukë.

Në fjalën e tij, Orban, deri më tani i vetmi lider evropian që takon Dodik, ka deklaruar se do t’i kushtojë më shumë vëmendje faktorit serb në Ballkan, kur Hungaria të marrë presidencën e BE-së në korrik.

“Gjithmonë i kam mbështetur serbët në politikat ndërkombëtare, pasi kam krijuar bindjen se këto politika nuk janë të drejta”, ka thënë Orban.

Sipas tij, në Bruksel nuk e kuptojnë se Evropës u duhen serbët, “pa të cilët nuk mund të ketë siguri evropiane”, ka vijuar Orban.

Nga ana e tij, Dodik, i cili synon bashkimin e Republikës Serbe me Serbinë, ka vlerësuar qëndrimin e shprehur nga mysafiri i tij.

“Serbët dhe hungarezët duhet të bashkëpunojnë në nivelet më të larta dhe ta bëjnë këtë jo në dëm të ndonjë pale të tretë”, ka thënë ai.

Gjatë qëndrimit në Banja Llukë, Orban, i njohur për lidhjen e ngushtë me presidentin rus Putin, është nderuar nga Dodik me medaljen shtetërore.

Takimi vjen pasi muajin e kaluar, liderët e BE-së ranë dakord të hapnin bisedimet e anëtarësimit me Bosnjën, por deklaruan njëzëri se deri në anëtarësim vendi ballkanas ka shumë punë për të bërë.

LEXONI GJITHASHTU:

• Dodik pretendon se po e kërcënojnë me burg: Do rezistojmë
• Vulin: Do na shkatërrojnë, Serbia do shpallet shtet gjenocidal! Dodik do arrestohet