Osmani në seancën e 2 Kuvendeve: Bashkëpunimi Kosovë-Shqipëri, nevojë e domosdoshme

Në Prishtinë u mbajt këtë të premte seanca e përbashkët e Kuvendit të Kosovës dhe Kuvendit të Shqipërisë.

Në fjalën e saj, Presidentja e Kosovës, Vjosa Osmani, theksoi se ky takim jo vetëm që reflekton trashëgiminë e përbashkët kulturore dhe historike, por gjithashtu pasqyron angazhimin e palëkundur për të krijuar një të ardhme të denjë dhe të qëndrueshme për qytetarët e të dy vendeve.

“Kjo seancë e përbashkët duhet të shërbejë si një thirrje për veprim të koordinuar dhe një kujtesë se qëllimi ynë i përbashkët kërkon ambicie të mëdha dhe përpjekje të pandërprera. Jemi në një periudhë sfidash të shumta, që kërkon një angazhim të përbashkët dhe bashkëpunim të ngushtë për të arritur qëllimet tona,” deklaroi Osmani.

Presidentja Osmani theksoi gjithashtu rëndësinë e forcimit të shtetit të Kosovës, duke e lidhur këtë me forcimin e Shqipërisë. Ajo theksoi se një Kosovë e fortë do të kontribuonte gjithashtu në forcimin e Shqipërisë dhe anasjelltas.

“Një Shqipëri e fuqishme është një Kosovë më e fortë, dhe një Kosovë e suksesshme ndihmon në ngritjen e mëtejshme të Shqipërisë. Ky është një proces që kërkon angazhim të përbashkët dhe është përgjegjësi e të dyja shteteve,” tha Osmani.

Presidentja Osmani nënvizoi se lidhjet mes dy shteteve duhet të thellohen dhe se bashkëpunimi nuk është opsion, por një domosdoshmëri për të realizuar qëllimet e përbashkëta.

“Së bashku, si dy shtete të pavarura dhe sovrane, të bashkuara nga historia, gjuha dhe kultura, duhet të ecim përpara krah për krah, ashtu siç kemi bërë gjithmonë,” tha ajo, duke theksuar se ky bashkëpunim është thelbësor për stabilitetin dhe zhvillimin e të dyja vendeve.

Po ashtu, Presidentja Osmani kërkoi një unifikim të politikës së jashtme mes Kosovës dhe Shqipërisë, duke theksuar se bashkëpunimi i ngushtë ndërmjet dy shteteve është çelësi për avancimin e integrimit euro-atlantik të të dyja vendeve.

“Bashkëpunimi mes nesh është një nevojë e domosdoshme. Nuk është një zgjedhje, por një kërkesë për të siguruar një të ardhme më të mirë dhe për të ndihmuar në realizimin e synimeve të përbashkëta,” tha Osmani.

Presidentja Osmani gjithashtu foli për rëndësinë e anëtarësimit të Kosovës në NATO, duke e cilësuar këtë si një hap të rëndësishëm për të frenuar çdo përpjekje hegjemoniste të Serbisë ndaj Kosovës.

“Anëtarësimi i Kosovës në NATO është një hap i domosdoshëm që do t’i japë fund çdo lloj apetitësh hegjemonistik ndaj Kosovës dhe do të sigurojë paqen dhe stabilitetin në rajon,” u shpreh ajo.

Më tej, Presidentja Osmani apeloi për vëmendje ndaj zhvillimeve të rrezikshme në rajon, duke përmendur tendencat për destabilizim në Maqedoninë e Veriut dhe kërcënimet ndaj përdorimit të gjuhës shqipe.

“Ne nuk mund të qëndrojmë të heshtur dhe as të mbyllim sytë ndaj këtyre tendencave që dëmtojnë paqen dhe stabilitetin rajonal,” përfundoi Osmani.

LEXONI GJITHASHTU:

• Konjufca: Shqipëri-Kosovë duhet të jenë bashkë pa asnjë kusht për sfidat e sigurisë
• Rama: Kosova duhet ta ngrijë pa afat dialogun bilateral me Serbinë