Osmani: Nëse dikush dëmtohet nga Ballkani i Hapur, RMV-ja s’do jetë pjesë e nismës

Ministri i Punëve të Jashtme i Maqedonisë së Veriut, Bujar Osmani deklaroi se nisma e Ballkanit të Hapur synon thellimin e bashkëpunimit mes shteteve të rajonit, por ajo, sipas tij “nuk do të jetë e plotë pa pjesëmarrjen e të gjashtë shteteve të Ballkanit Perëndimor”.

Në një aktivitet me ambasadorin e Kosovës në Shkup, Florian Qehaja, me rastin e 13 vjetorit të vendosjes së marrëdhënieve diplomatike ndërmjet dyja vendeve, Osmani tha se Maqedonia e Veriut mund të largohet nga Ballkani i Hapur nëse ndonjë nga shtetet do të dëmtohej nga kjo një nismë, shkruan REL.

“Ne, si Maqedoni e Veriut nuk do të lejojmë që ndonjë shtet tjetër të dëmtohet. Ne konsiderojmë se nëse dikush do të dëmtohet, mendoj këtu edhe për Kosovën për shkak të pikëpamjeve të saj ndaj kësaj nisme, atëherë ne nuk do të marrim pjesë në këtë nismë. Ne do të jemi gardianë të mbrojtjes së cilit do shtet në Ballkanin e Hapur”, theksoi ai.

Sipas tij, Maqedonia e Veriut i jep mbështetje Kosovës në të gjitha nismat dhe përpjekjet për anëtarësim në institucionet ndërkombëtare si në NATO, Këshillin e Evropës si dhe liberalizimin e vizave.

Ndër të tjera, Osmani nënvizoi se kjo është rruga e vetme për të stabilizuar rajonin që të vazhdojë procesin e anëtarësimit në NATO dhe BE.

LEXONI GJITHASHTU

• Deputetja shqiptare në Kroaci: Ballkani i Hapur, një nismë ku dominon Serbia
• Rama në OKB: Ftojmë Greqinë e Turqinë në nismën “Ballkani i Hapur”
• Ministri i Jashtëm turk: Ballkani i Hapur, urë mes rajonit dhe Bashkimit Evropian