Osmani pas takimit me ambasadorët e QUINT-it: Serbisë duhet t’i kërkohet llogari

Presidentja e Republikës së Kosovës, Vjosa Osmani zhvilloi këtë të premte një takim me ambasadorët e Shteteve të Bashkuara të Amerikës, Britanisë së Madhe, Gjermanisë, Francës, Italisë dhe të Bashkimit Evropian.

Në këtë takim ata diskutuan situatën aktuale në veri të vendit pas sulmit terrorist dhe aktit të agresionit të Serbisë kundër Republikës së Kosovës.

Sipas njoftimi që ka lëshuar presidenca, në takim Osmani ka falënderuar ambasadorët për solidaritetin dhe ngushëllimet e shprehura për vrasjen e heroit të Kosovës, rreshterit të Policisë së Kosovës, Afrim Bunjakut, si dhe lëndimit të disa policëve tjerë.

Ajo vlerësoi punën e shkëlqyeshme dhe profesionale të Policisë së Kosovës dhe institucioneve të tjera të sigurisë në ballafaqimin me sulmin terrorist.

Presidentja Vjosa Osmani ka theksuar rëndësinë e bashkëpunimit të ngushtë me shtetet aleate dhe koordinimit të institucioneve të sigurisë, me qëllim të parandalimit të përsëritjes së akteve të tilla.

“Kosova është e vendosur që të vazhdojë ta promovojë paqen dhe stabilitetin në rajon, si dhe të punojë me komunitetin lokal serb për t’i afruar dhe integruar në shoqërinë dhe institucionet e Kosovës”,- ka theksuar Presidentja Osmani.

Ajo ka bërë të ditur se institucionet e Republikës së Kosovës janë të përkushtuara në menaxhimin e situatës aktuale dhe për të ndihmuar në arritjen e ruajtjen e paqes dhe stabilitetit.

Sipas Osmanit, duhet që Serbisë t’i kërkohet llogari për veprimet e saj kundër Kosovës, duke ia bërë të qartë se duhet të ndalojë financimin, mbështetjen dhe shtytjen e grupeve kriminale për veprime terroriste.

“Mungesa e masave të tilla mund të keqpërdoret nga ana e Serbisë dhe për rrjedhojë mund të kemi përsëritje të veprimeve terroriste”, -ka nënvizuar Osmani.

LEXONI GJITHASHTU:

• Milan Radoiçiç konfirmon pjesëmarrjen dhe organizimin e sulmit në Banjskë
• Kosovë| Policia aksion në Veri, kontrolle në 5 pika të ndryshme. Apeli për qytetarët
• NATO njofton shtimin e trupave të KFOR-it në Kosovë