Osmani: SHBA-ja është në ADN-në e suksesit të Kosovës

Presidentja e Kosovës, Vjosa Osmani ka thënë se roli i SHBA-ve ka qenë përcaktues për fatin e Kosovës, ndaj SHBA-ja është në ADN-në e suksesit të shtetit tonë.

Osmani ka shkruar në Facebook se në eventin qendror me rastin e 20-vjetorit të Korporatës së Sfidave të Mijëvjeçarit (MCC) me pjesëmarrjen e Presidentit George W. Bush, njëherësh themelues i MCC-së ka folur për shtetndërtimin dhe zhvillimin e Kosovës, ku ka rikonfirmuar rolin e pakontestueshëm të SHBA-ve për lirinë dhe shtetndërtimin e Kosovës.

“Në të njëjtën frymë sot, MCC-ja po e vazhdon këtë trashëgimi  duke ofruar mbështetje të çmueshme për zhvillimin ekonomik e të qëndrueshëm të Kosovës duke e bërë vendin tonë pjesë të pandashme të sukseseve, të cilat i përfaqëson SHBA-ja kudo në botë”, ka shkruar Osmani.

Presidentja e Kosovës, Vjosa Osmani, ka udhëtuar për vizitë zyrtare në Teksas të SHBA-së ku do të merr pjesë në Samitin SHBA-Afrikë, me ftesë të Qeverisë amerikane, përkatësisht agjencisë qeveritare Korporata e Sfidave të Mijëvjeçarit- MCC. Ajo gjatë këtij samiti do të mbajë fjalim, si dhe pritet të zhvillojë takime me homologë nga disa vende afrikane. Osmani do të zhvillojë takim edhe me krerët e shtetit të Teksasit, zyrtarë të tjerë të lartë të këtij shteti, zyrtarë të lartë shtetërorë të institucioneve amerikane dhe përfaqësues të Kongresit amerikan.

LEXONI GJITHASHTU:

• Presidentja Osmani udhëton për në Teksas të SHBA, merr pjesë në Samitin SHBA-Afrikë
• Kryetarja e Komitetit të Helsinkit në Serbi: Uroj që Kosova të futet në KiE