Pa autobus prej vitesh, banorët e Babicës presin deri një orë anës rrugës

I ndodhur vetëm 3.7 km nga qendra e Vlorës, fshati Babicë e Madhe, pjesë e njësisë administrative qendër vuan prej vitesh mungesën e transportit publik. Pjesë e fshatit janë rreth 5 mijë banorë, të cilët tregojnë se për të lëvizur drejt qytetit përdorin automjete të rastit ose furgonat e linjës.

Banorët tregojnë se presin me orë të gjata anës rrugës për të lëvizur drejt Vlorës, ndërsa përveç rrezikut që iu kanoset, mungesa e autobusit publik ka edhe kosto.

Sipas banorëve, vendosja e një linje të rregullt transporti është jetike për zonën, ndaj u bëjnë thirrje institucioneve vendore që të marrin masa dhe të plotësojnë këtë nevojë të kahershme.

 “Jemi pa autobusë, kemi fugonët e fshatrave, po s’u mbush s’lëviz nga vendi, do 1 orë, pse jo 2, e të tjerët presin këtu. S’ka as urban, asnjë gjë, s’ka shtet. Janë privatë fugonët, vetëm autobus s’kemi pasur asnjëherë”, thotw njw burrw.

 “Unë rri në fund të Ali Kokës, vij të marr pensionin e presim fugonët kur vijnë ose taksixhiun e lagjes. Ka herë s’vijnë, ja presim në mes të rrugës. Unë jam shumë larg, u ngre dorën ç’të më dalë. Duhet urban, po ku dimë ne? Duhet zgjidhur kjo gjë se s’e kemi ne në dorë”, shprehet njw tjetwr.

Nuk është vetëm Babica e Madhe që zgjidhjen banorët e gjejnë te furgonët e fshatrave, por ka edhe fshatra të tjerë të cilët janë pranë Vlorës, si Alikoka, Narta, Zvërneci, Sherishta, Babicë e Vogël etj.