Paga e premtuar, sipërmarrësit rrezikojnë falimentimin, shpenzimet tepër të larta

Flauers Çaku pas 40 ditësh është rikthyer në biznesin e tij të vogël në pedonalen e qytetit të Shkodrës. Ai shprehet se ka marrë pagën minimale të premtuar  nga shteti, por kjo nuk i mjafton në situatën ku ai ndodhet.

“Më është miratuar paga e ndihmesës. I kemi marrë dhe ka kaluar me të gjithë procedurat në bankë. Është një pagë më shumë ndihmës për punëtorët e mi se sa për mua si biznes dhe si titullar i këtij biznesi, sepse shpenzimet janë shumë të larta në krahasim me atë pagë”, tha ai.

Ardhja e turistëve gjatë këtyre muajve është burimi kryesor i të ardhurave për xhiron e këtij biznesi e në mungesë të tyre këto biznese rrezikojnë falimentimin.

“Baret e restorantet do të jenë të fundit biznese që do të hapen. Kjo është shumë problematike. Shpenzimet mujore i kemi shumë të larta dhe rrezikojmë falimentimin”, shtoi zoti Çaku.

Biznesi i vogël është një nga kategoritë më të dëmtuara nga COVID-19 . Pavarësisht ndihmës së dhënë nga qeveria shqiptare me “pagën e premtuar” situata mbetet shumë problematike.