Pagërrjedhja, Andi Bushati fajëson SPAK, Baton Haxhiu drejton gishtin nga gjykatat

Temë diskutimi mes analistëve Andi Bushati dhe Baton Haxhiu në “Shock” ka qenë pagërrjedhja e dytë e publikuar sot për muajin prill, që shoqërohej bashkë me numrat e telefonit për mbi 600 mijë punonjës.

Sipas Bushatit, SPAK duhet të kishte hetuar autorët e “Patronazhistëve” në mënyrë që të parandalohej kjo që ka ndodhur ditët e fundit.

Ai nënvizoi se ka pasur një negilizhencë me qëllim duke qenë se i përfshirë ka qenë kryeministri, Edi Rama dhe Partia Socialiste.

“I kam pasur para syve prokurorët e SPAK dhe u thosha pse nuk shkoni tek AKSH-i. E vërteta është shumë e thjesht, këto të dhëna. Kam qenë i përfshirë në këtë proces dhe nuk donin të hetonin se e dinin se këto të dhëna i dispononin Edi Rama dhe PS”, tha Andi Bushati.

Ndërsa Baton Haxhiu u shpreh se vjedhja e të dhënave personale është bërë për një qëllim dhe kjo gjë duhet hetuar.

“Nuk ka mbetur gjë tjetër për të dalë. Ka ngel vetëm të dalin dosjen e spitalit. Dhimbja më e madhe përveç humbjes së ndërgjegjes në publikimin e tyre, nuk pashë gjykatës që e ndalojnë publikimin. Nuk pashë një mbledhje urgjente të gjykatës”, tha ai.