Pak para për të parandaluar përmbytjet, fondi i Ministrisë së Bujqësisë

Ministria e Bujqësisë ka shpenzuar gjysmën e fondit të vendosur në dispozicion për kanalizimet dhe kullimin për këtë vit.

Të dhënat e raportit të monitorimit të buxhetit të ministrisë tregojnë se deri në muajin gusht nga 14 mln euro të përcaktuara për këtë qëllim, janë shpenzuar 7 milionë euro.

Fondi për këtë vit është përgjysmuar në krahasim me buxhetin e vitit 2021, ku për infrastrukturën e kanaleve vaditëse dhe të kullimit shifra ishte gati 31 milionë euro.

Për vitin 2023, buxheti i parashikuar për ndërhyrje në diga dhe kanalizime është parashikuar rreth 18 milionë euro, të cilit i shtohet edhe një grant prej 4.3 milionë eurosh nga Bashkimi Europian.

Nga kjo shifër, 2.7 mln do të shpenzohen për studimin e fizibilitetit të përmirësimit të mbrojtjes nga përmbytjet e shkaktuara nga lumenjtë Vjosa, Shkumbini, Erzeni, Ishmi dhe Semani.

Pjesa tjetër e këtij fondi do të shfrytëzohet për studimin e ndërhyrjeve në mbi 400 diga mbrojtëse të tokave bujqësore në qarqet më problematike, si Shkodër, Lezhë, Durrës dhe Fier.

Nga situata e përmbytjeve në Shkodër raportohet për mbi 1300 ha tokë nën ujë dhe mbi 15 familje të evakuuara këtë të mërkurë.

Më keq shfaqen njësitë administrative Ana e Malit, Dajç dhe Guri i Zi, ku niveli i ujit prezent në këto zona shkon deri në 60 centimetra.

LEXONI GJITHASHTU:

• Evakuohen 70 persona në Shkodër, afro 1365 ha tokë nën pushtetin e ujit
• Hetimi i pronave në Lalëz, si u tjetërsuan mijëra m2 përmes falsifikimit
• Shpallet në kërkim “Rrumi i Shijakut”, i përfshirë në rrëmbimin e dy vëllezërve