Kraja: Paratë e pista në Shqipëri po korruptojnë sistemin

Në Shqipëri qarkullojnë miliona euro nga aktivitete kriminale që kryen jashtë vendit. Këtë shqetësim kreu i SPAK, Arben Kraja e ndau me kolegët e antimafias italiane gjatë një konference në Bari.

“Edhe pse aktiviteti kriminal mund të zhvillohet jashtë Shqipërisë, pasojat vijnë edhe në Shqipëri. Transferimi i parave nga aktiviteti kriminal bëhet në Shqipëri. Janë para që përdoren për të dëmtuar zhvillimin e lirë. Përdoren për të korruptuar sistemin dhe për të rritur më tej aktivitetin kriminal”, tha Kraja.

SPAK po heton grupe kriminale që veprojnë në Gjermani dhe Spanjë, por shqetësim mbetet edhe roli gjithnjë e në rritje i shqiptarëve në vendet e origjinës së kokainës.

“Krimi shqiptar është i shtrirë jo vetëm në Europë por deri në Amerikën e Jugut. Kemi vendosur kontakte me gjithë homologët në rajon dhe më gjerë. Kemi 10 skuadra të përbashkëta hetimore me Italinë. Skuadra hetimore edhe me shtete të tjera, Gjermaninë dhe Spanjën. Në Shqipëri shohim shpesh vrasje mes grupeve kriminale për aktivitete që kanë kryer jashtë Shqipërisë. Në situatë të tillë është e domosdoshme bashkëpunimi me çdo strukturë jashtë”, u shpreh kreu i SPAK.

Vetëm gjatë 5 viteve të fundit 6 shqiptarë janë vrarë në Ekuador, Brazil dhe Kolumbi për shkak të trafikut të kokainës.

LEXONI GJITHASHTU:

• SPAK: Do administrojmë çdo fakt apo informacion për çështjen e inceneratorëve
• PD inkurajon SPAK të hetojë tenderin 500 mijë USD të FSHZH