Pas bllokimit të 50 tonëve misër, AKU Elbasan nis kontrolle në gjithë qarkun

Autoriteti Kombëtar i Ushqimit në Elbasan ka ndaluar një ngarkesë prej 50 tonësh misër rifuxho për bagëti, e importuar nga Serbia, në zbatim të urdhrit të Ministrisë së Bujqësisë për kontroll të shtuar dhe ndalim të përkohshëm të produkteve që vijnë nga ky vend. Masa është marrë pas dyshimeve për mospërputhje me standardet e sigurisë ushqimore, çka ka ngritur shqetësim mes autoriteteve dhe ka vënë fokusin te produktet bujqësore të importit.

Ngarkesa është bllokuar në një subjekt në Elbasan, ku inspektorët e AKU-së kanë kryer verifikimet e para dhe kanë marrë mostra për analizë laboratorike. Aktualisht, e gjithë sasia prej 50 tonësh ndodhet në pritje të rezultateve, ndërsa 25 tonë të këtij misri pritet të asgjësohen, bazuar në dyshimet fillestare dhe kontrollet paraprake.

Në të njëjtën kohë, AKU Elbasan ka intensifikuar kontrollet edhe në subjekte të tjera të qarkut, me synimin të garantojë sigurinë ushqimore dhe mbrojtjen e konsumatorëve. Autoriteti paralajmëron se çdo produkt që nuk përmbush standardet do të bllokohet dhe, nëse është e nevojshme, do të asgjësohet.

Institucionet vijojnë monitorimin, ndërsa pritet që në ditët në vijim të publikohen rezultatet përfundimtare të analizave.

LEXONI GJITHASHTU:

• Rrumbullaku pas daljes nga SPAK: Kur të thërret drejtësia duhet të paraqitesh
• Ish-drejtori i Policisë së Shtetit Muhamet Rrumbullaku paraqitet në SPAK