Pas eliminimit nga Champions, Empoli “shuplakë” Juventusit në kupë

Juventus është eliminuar nga Kupa e Italisë pas një disfate në çerekfinale ndaj Empolit. Koha e rregullt u mbyll në barazim 1-1, ndërsa në penallti bardhezinjtë humbën 4-2.

Askush nuk e kishte parashikuar se, pas eliminimit nga Champions League, Juventus do të largoheshin edhe nga Kupa e Italisë, duke mbetur vetëm me garën në Serie A. Mbrëmja e së mërkurës ishte një nga ato që duhet harruar për trajnerin Thiago Motta dhe lojtarët e tij, të cilët morën një shuplakë nga Empoli, ndërsa tekniku tani rrezikon seriozisht shkarkimin.

Në Allianz Stadium, tifozët e shumtë nuk ishin mjaftueshëm për të shpëtuar “Zonjën e Vjetër”, e cila, edhe pse dominonte në fushë, nuk mundi të shënonte dhe të ndalonte problemet e zakonshme kur vjen puna te rezultati. Empoli surprizoi që në minutën e 24’, kur Maleh zhbllokoi shifrat, ndërsa miqtë shpërdoruan disa mundësi të pastra shënimi. Në pjesën e dytë, Thuram, pas një lëvizjeje të bukur në zonë, u ballafaqua me portierin dhe shënoi për të barazuar rezultatin 1-1.

Më pas, nuk pati zhvillime të tjera dhe skuadrat u drejtuan drejt penalltive, ku Empoli tregoi qetësi më të madhe. Vlahovic dhe Yildiz shpërdoruan mundësitë e tyre, ndërsa shënuan Kolo Muani dhe Locatelli. Nga ana tjetër, shënuan Henderson, Kouame, Cacace dhe Marianucci. Përfundimi ishte 4-2 dhe Juventus doli jashtë kupës. Empoli do të përballet me Bolonjën, ndërsa gjysmëfinalja tjetër është derbi Milan-Inter. Ky ishte kompeticioni i tretë që Thiago Motta humb dhe rrezikon të shkarkohet, pasi më parë ka dështuar në Champions League dhe në Superkupën e Italisë.