Pas negociatave në Stamboll, Rusia emëron ambasadorin e ri në SHBA

Rusia ka emëruar diplomatin e karrierës, Alexander Darchiev, si ambasadorin e saj të ri në Shtetet e Bashkuara, duke plotësuar një post që kishte mbetur vakant që nga viti i kaluar. Lajmi u konfirmua të premten nga Ministria e Jashtme e Rusisë.

Sipas ministrisë, Darchiev pritet të nisë detyrën e tij në Uashington në të ardhmen e afërt. Emërimi i tij vjen pas bisedimeve midis Shteteve të Bashkuara dhe Rusisë të zhvilluara në Stamboll të enjten.

Agjencia Reuters raporton se Rusia ka marrë miratimin nga SHBA për këtë emërim dhe se Darchiev do të niset së shpejti drejt Uashingtonit.

Darchiev ka mbajtur më parë postin e kreut të Departamentit të Amerikës së Veriut në Ministrinë e Jashtme ruse. Moska nuk ka pasur ambasador në Uashington që nga tetori i vitit të kaluar, kur ish-ambasadori Anatoly Antonov u largua nga posti i tij.

LEXONI GJITHASHTU:

• Zelensky flet për marrëveshjen me Trump: Fillimi i një suksesi të madh
• Çfarë përfshin marrëveshja Trump-Zelensky, pse SHBA i do me çdo kusht mineralet