Pasivizimi i adresave, zyrtari në Bujanoc: Nën dijeni ambasadat, asnjë veprim

Kryetari i Kuvendit Komunal në Bujanoc, Enver Ramadani tha për emisionin “Mirëmëngjes” në Euronews Albania se pasivizimi i adresave të shqiptarëve është një nga problemet kryesore.

“Problematikat e shqiptarëve të Luginës së Preshevës janë të njëjtat. Diskriminim total ndaj shqiptarëve në tërësi duke tentuar që në mënyrë ligjore ta pasivizojnë popullatën shqiptare që jetojnë në këto komuna”, u shpreh ai.

Z. Ramadani nënvizoi se shqiptarët në këtë zonë rrezikojnë të humbasin kartën e identifikimit dhe pasaportën.

“Sensibilimi i kësaj çështje është bërë deri në arenën ndërkombëtare. Kemi bërë mjaft sa i kësaj problematike. Duke e rregulluar aq mirë me ligj po e përdorin këtë metodë. Edhe ambasadat këtu në Serbi janë të njoftuar për këtë çështje. Për momentin kemi hasur në vesh të shurdhët”, u shpreh ai.

Sa i përket shqiptarëve të punësuar në institucionet shtetërore në Luginën e Preshevës, z. Ramadani tha se janë shumë të paktë në numër.