Pavarësia e Kosovës, analisti: Greqia dhe Spanja mund ta njohin shumë shpejt

Analisti Sadri Ramabaja është shprehur se pas përfundimit të zgjedhjeve në Serbi, pritet që Greqia e cila është një nga 5 vendet europiane që nuk e kanë njohur pavarësinë e Kosovës, ta bëjë këtë shumë shpejt.

Komentet Ramabaja i bëri përmes një interviste në “EuroNews Now” në EuroNews Albania, ku tha se ka gjasa të mira që pavarësinë e Kosovës ta njohë dhe Spanja e Rumania.

Ai tha gjithashtu se vendi më i vështirë për ta njohur pavarësinë e Kosovës është Sllovakia, pasi sipas tij, atje mund të kemi një pozicion pro-rus me qeverinë e re.

“Është e qartë se ata po e identifikojnë qëndresën e këtyre 10 viteve me emrin e Albin Kurtit dhe ndoshta kanë të drejtë, sepse kanë këtu dy vite të funksionalizimit të Republikës së Kosovës në Veri. Nuk e di se përse insistoni në njohjen e Kosovës sa më shumë, pasi Bosnjën e njohin edhe më shumë vende, por nuk është një shtet shumë funksional.

E rëndësishme është që Kosovën ta njohë 4-tërshja e NATO-s. Kosova ka kohë që është shndërruar në peng të gjeopolitikës, por kjo nuk mund të vijojë. Kam përshtypjen se pas zgjedhjeve në Serbi, pesshja e BE-së do ta ketë të vështirë të rezistojë njohjes së Kosovës.

Kam përshtypjen se e para që do ta thyejë këtë rezistencë dhe do ta njohë Kosovën do të jetë Greqia, por gjasa të mira janë që edhe në Spanjë e Rumani të kemi lëvizje pozitive. Por më e ndjeshme është Sllovakia, pasi atje kemi një pozicion tërësisht pro-rus, pasi mundësia që pozicioni i saj të lëvizë pro-njohjes së Kosovës është e vështirë”, është shprehur Ramabaja.

LEXONI GJITHASHTU:

• Eksperti Shala tregon emrin e hartuesit të draft asociacionit
• Hovenier: SHBA-ja, e gatshme ta këshillojë Kosovën për statutin e Asociacionit