PD ankimon rezultatin e zgjedhjeve edhe për Fierin, Lezhën dhe Durrësin

Në vijim të kundërshtimeve për rezultatin e zgjedhjeve të 11 majit, Partia Demokratike ka depozituar këtë të mërkurë ankimime të reja në Komisionin e Ankesave dhe Sanksioneve në KQZ, duke kërkuar shqyrtimin e rezultatit për qarqet Fier, Lezhë dhe Durrës.

Ashtu siç ka paralajmëruar më herët, PD synon të ankimojë rezultatin në të gjitha qarqet e vendit, me qëllim që të mos e njohë procesin zgjedhor të 11 majit.

Sipas PD-ASHM, gjatë zgjedhjeve janë vërejtur shkelje të rënda, ku funksionarë të ndryshëm shtetërorë jo vetëm janë angazhuar në fushatë, por edhe janë përfshirë në skema për tjetërsimin e votës së qytetarëve, përmes blerjes së saj apo formave të tjera të presionit.

Partia Demokratike gjithashtu deklaron se ka denoncuar raste ku eksponentë të krimit të organizuar kanë patrulluar në zonat urbane dhe rurale, kanë bllokuar rrugë dhe kanë ushtruar presion të drejtpërdrejtë mbi qytetarët dhe familjet e tyre, me qëllim ndikimin në votë.

LEXONI GJITHASHTU:

• Përfaqësuesi ligjor i PD: Brenda dy ditësh pritet reagim ndërkombëtar për zgjedhjet
• PD ankimon rezultatin e zgjedhjeve të 11 majit për qarqet Vlorë dhe Gjirokastër