PD denoncoi lokalin me materiale zgjedhore në Peqin, reagon policia

Policia e Peqinit ka sekuestruar  disa materiale të dyshuara zgjedhore të falsifikuara dhe armë në një lokal në fshatin Pekisht, ditën e djeshme të 22 majit.

Policia ndërhyri pas një njoftimi dhe denoncimi nga ana e PD-së për praninë e materialeve të dyshimta zgjedhore në lokalin e shtetasit Dervish Beqiri.

Gjatë kontrollit, në vendngjarje u sekuestruan 10 fletë të ngjashme me fletët e votimit të paplotësuara dhe të dyshuara të falsifikuara, si dhe një listë me emra zgjedhësish. Në të njëjtin lokal u gjet dhe sekuestrua edhe një portofol me 280 000 lekë.

Kontrolli vijoi më pas edhe në banesën e Dervish Beqirit ku u gjetën një pushkë e vjetër trofe dhe një pistoletë zhurmuese (sportive), të cilat u sekuestruan.

Policia ka referuar materialet procedurale në Prokurori dhe ka nisur procedim penal ndaj shtetasit Dervish Beqiri për veprat penale “Falsifikimi i materialit zgjedhor dhe rezultateve të zgjedhjeve” dhe “Prodhimi dhe mbajtja pa leje e armëve të gjuetisë dhe sportive”.

LEXONI GJITHASHTU:

• Trafiku drogës, kush janë 28 të proceduar e grupit ‘Ura’ që GJKKO u rivlerëson masat
• Kush janë të “fortët” e arrestuar në restorantin në Lalëz, detaje nga operacioni