Deputeti i Partisë Demokratike, Asllan Dogjani, kërkoi gjatë punimeve të seancës plenare mbajtjen e një minute heshtje në nder të 14-vjeçarit të vrarë në shkollën “Fan Noli” nga një bashkëmoshatar i tij. Dogjani, së bashku me deputetët e tjerë të PD-së, u ngritën në këmbë dhe kërkuan që, në respekt të viktimës, familjarëve të tij, nxënësve dhe mësuesve, të mbahej një minutë heshtje.

Kryetarja e Kuvendit, Elisa Spiropali, deklaroi se në sallë nuk ishin të pranishëm të gjithë deputetët dhe sugjeroi që mbajtja e heshtjes të bëhej në një moment tjetër. Spiropali bëri apel ndaj deputetëve demokratë që të mos e përdornin këtë tragjedi për përfitime politike.

Duke folur në Kuvend, Dogjani tha: “I propozoj Kuvendit të mbajmë një minutë heshtje në respekt të prindërve, familjarëve, nxënësve, mësuesve dhe fëmijëve të Shqipërisë”.

Përgjigjja e Spiropalit ishte: “Kjo është një ngjarje tragjike. Duhet të bisedojmë dhe të vendoset në një kohë të përshtatshme. Këtu nuk janë të gjithë deputetët dhe do të ishte mungesë respekti për viktimën dhe familjen e tij. Të mos e përdorim për politikë të ditës. Duhet të gjejmë një kohë kur të jenë të gjithë deputetët. I bëjmë thirrje deputetëve të jenë në sallë”.