PD kërkon ngritje të Komisionit të Posaçëm për Reformën Zgjedhore

Partia Demokratike ka depozituar sot në Kuvend kërkesën për ngritjen e Komisionit të Posaçëm për Reformën Zgjedhore.

Në kërkesën e firmosur nga 10 deputetë thuhet se Komisioni ka për detyrë hartimin e ndryshimeve kushtetuese dhe të kuadrit ligjor zgjedhor për trajtimin e rekomandimeve të raporteve të OSBE/ODIHR-it për zgjedhjet e 25 prillit dhe zgjedhjeve të mëparshme të pa trajtuara.

Gjithashtu, në kërkesë thuhet se Partia Demokratike ka konstatuar 5 shkelje të rënda që minuan procesin demokratik të zgjedhjeve parlamentare të 25 Prillit që kishin të bënin me shitblerjen e vote, përdorimin e paligjshëm të të dhënave personale si dhe ndryshime të njëanshëm në kushtetutë dhe kodin zgjedhor që sollën heqjen e koalicioneve.

Konstatimet e PD-së:

• Shitblerja masive e votës, e realizuar nga bashkëpunimi i kandidatëve të mazhorancës me elementë të krimit të organizuar;
• Shkrirja e shtetit dhe Partisë në pushtet në një të vetëm;
• Vjedhja dhe përdorimi i paligjshëm i të dhënave personale dhe sensitive;
• Ndalimi antikushtetues i të drejtës së emigrantë për të marrë pjesë në zgjedhjeve, veçanërisht atyre që jetojnë në Republikën e Greqisë dhe Maqedonisë së Veriut;
• Ndryshimet e njëanshme në Kushtetutë dhe Kodin Zgjedhor, që sollën heqjen e koalicioneve dhe një format flete votimi, që prodhoi 83 mijë fletë votimi të pavlefshme.

“Secila prej këtyre problematikave, krahas rekomandimeve përkatëse u pasqyrua në mënyrë të detajuar edhe në raportin përfundimtar të Misionit për Vëzhgimin e Zgjedhjeve të OSBE/ODIHR, publikuar më 26.07.2021”, thotë Partia Demorkatike.

PD-ja bën me dije se Grupi Parlamentar i saj ka aktivizuar edhe një mekanizëm tjetër parlamentar “që ka të bëjë me ngritjen e Komisionit Hetimor për zgjedhjet e 25 Prillit 2021, një prej detyrave kryesore të të cilit është edhe vlerësimi i nevojë për miratimin, korrigjimin apo ndryshimin e akteve ligjore”.

Partia Demokratike e ka kontestuar publikisht procesin zgjedhor të zhvilluar më 25 Prill 2021, duke e cilësuar si “masakrër zgjedhore”.

LEXONI GJITHASHTU:

• Zbardhen ndryshimet kushtetuese që propozon PD: Vetting i politikanëve, Reformë Zgjedhore dhe Territoriale