PE: Keqardhje për mospërshtatjen e Serbisë me sanksionet

Parlamenti Evropian shpreh keqardhje për mospërshtatjen e Serbisë me sanksionet e BE-së ndaj Rusisë.

Në rezolutën që pritet të miratohet sot në seancën e jashtëzakonshme të  PE-së, thuhet se mos rreshtimi i Serbisë përkrah vendeve perëndimorë dëmton procesin e anëtarësimit drejt BE-së dhe “përsëritet pritja që kandidatët për anëtarësim në BE të përshtaten jo vetëm me ligjet e BE-së, por edhe me politikën e jashtme dhe të sigurisë së bllokut”, thuhet në rezolutën që pritet të votohet në Parlamentin Evropian.

Në seancën e jashtëzakonshme të Parlamentit Evropian që po mbahet sot, pritet të miratohet një rezolutë për agresionin e Rusisë në Ukrainë.

Përveç dënimit të sulmit rus dhe shprehjes së mbështetjes për rezistencën ukrainse, Parlamenti Evropian pritet të shprehë edhe shqetësimin për tentimet e Rusisë për të destabilizuar rajonin e Ballkanit Perëndimor.

Në rezolutë dënohen vendet që “kanë shprehur mbështetje për Federatën Ruse për agresionin në Ukrainë dhe mirëpritet mbështetja e shprehur nga ato vende të Ballkanit Perëndimor të cilat janë aleate euro-atlantike”.

“Shohim me shqetësim të thellë përpjekjet këmbëngulëse të Federatës Ruse për destabilizimin e vendeve të Ballkanit Perëndimor dhe ndërhyrjen në proceset e tyre demokratike”, thuhet në tekstin e rezolutës.

LEXONI GJITHASHTU:

• Përditësime LIVE 1 mars: Zelensky-BE-së: Mos hiqni dorë nga ne