Pengu i patreguar i Dhimitër Anagnostit, Mevlan Shanaj: Vitet e fundit kishte…

Regjisori, aktori dhe producenti Mevlan Shanaj foli për Euronews Albania lidhur me ndarjen nga jeta të regjisorit të njohur Dhimitër Anagnosti.

Shanaj shprehet se ky artist i madh la pas jo vetëm veprat e tij të mëdha, por dhe krijimin e karakterit dhe psikologjisë së qytetarëve shqiptarë. Mevlan Shanaj thekson se Anagnosti kohët e fundit po përballej me një gjendje jo të mirë shëndetësore, çka e bëri që të shkëputej nga gjërat e zakonshme të ditëve të tij.

“Anagnosti, intelektual në nivele të larta, nuk ishte i zakonshëm. Sa i përket veprave të tij, ai ka një grup krijimesh. Ai kishte krijimin e psikologjisë, karaktereve, atmosferës.

Përveç regjisurës, ai arriti të bëhej shkrimtar, dramaturg, me pak fjalë ishte një vlerë kombëtare. Në fushën e tij, ishte i penës së Kadaresë, i la shoqërisë shqiptare vepra të mëdha monumentale, por mbi të gjitha la psikologjinë, karakterin e shqiptarit, dhe është shumë e vështirë ta krijosh psikologjinë  e kombit tënd.

Anagnosti thoshte se është e vështirë për t’u gjetur arti i vërtetë, dhe ai luftonte shumë.

Nga ana tjetër, ai vitet e fundit nuk ishte mirë me shëndet, kishte zgjedhur të tërhiqej dhe të mos fliste shumë. Ishte Roza ajo që menaxhonte çdo gjë dhe përkujdesej.

Ishte burrë i zgjuar dhe i vështirë, por talent absolut. Nuk besoj që mund të vij një Anagnosti tjetër në Shqipëri”, tha Mevlan Shanaj.

LEXONI GJITHASHTU:

• Nesër i jepet lamtumira e fundit Dhimitër Anagnostit, homazhet do mbahen në TKOB
• Ndarja nga jeta e Anagnostit, vjen reagimi i Berishës: Kollos i regjisë