Pensionimi i një legjende, Iniesta tërhiqet nga futbolli në moshën 40-vjeçare

Siç çdo fillim ka një fund, e tillë është dhe karriera sportive, por arritjet mbahen mend. Njëri prej tyre, i shkruar me gërma të arta, është Andres Iniesta. Spanjolli ka marrë vendimin për t’u tërhequr nga futbolli i luajtur në moshën 40-vjeçare, ndërsa zyrtarizimi do të bëhet më 8 tetor. Në profilin e tij zyrtar në Instagram, mesfushori ka publikuar një video për të treguar se koha e tij si futbollist aktiv i ka ardhur fundi dhe me gjasa do t’i bashkohet Barcelonës për ndonjë rol specifik.

Kujtojmë se tek katalanasit, Iniesta u rrit si futbollist dhe fitoi gjithçka gjatë 18 viteve qëndrim, përfshirë katër herë Ligën e Kampionëve. Ai ka luajtur afro 500 ndeshje dhe ka shënuar 40 gola, por asistet ishin pika e tij më e fortë, së bashku me Xavin dhe Mesi, që asokohe ishte një goleador i Barcelonës.

Fundi i karrierës së 40-vjeçarit ishte në Emiratet e Bashkuara Arabe, ku përgjatë sezonit 2023-2024 luajti 20 ndeshje dhe gjeti 5 herë rrugën e rrjetës.

LEXONI GJITHASHTU:

• Varane tërhiqet nga futbolli në moshën 31-vjeçare
• Griezmann “var këpucët në gozhdë”, tërhiqet nga kombëtarja