Pensionistët britanikë pushojnë në Shqipëri, klima një nga arsyet

Në një kohë që shqiptarët i shtyn drejt Britanisë së Madhe papunësia, varfëria dhe ambicia për më shumë të ardhura në më pak kohë, britanikët po zgjedhin gjithnjë e më shumë Shqipërinë për t’u ikur muajve të ftohtë e të lagësht të dimrit në ishull.

Mediat britanike shkruajnë se ka një fluks prenotimesh drejt Shqipërisë, që e kanë zgjedhur vendin tonë për dy arsye; klima e ngrohtë dhe me diell gjatë muajve të dimrit dhe çmimet e lira.

Rritja e prenotimeve për pushime të gjata dy deri në tre muaj është vënë re, sipas “Daily Star”, gjatë muajit shtator. Një pjesë e mirë janë pensionistë që vitet e tjera kanë zgjedhur të pushojnë gjatë dimrit në Karaibe dhe ishujt Kanarie.

Por, me rritjen e fortë të çmimeve të energjisë elektrike në këto vende, sipas mediave britanike, ata po kërkojnë alternativa të tjera me më pak kosto. Shqipëria vlerësohet si njëra prej tyre.

Sipas fushatave promocionale të agjencive turistike, britanikët mund të kursejnë deri në 64 për qind të pensioneve mujore në Shqipëri dhe për më tepër të shijojnë klimën e ngrohtë dhe me diell gjatë muajve të dimrit.

LEXONI GJITHASHTU:

• Inflacioni, qytetarët parashikojnë ulje më shpejt se bizneset e bankat
• BSH rrit normën e interesit, Sejko: Inflacioni, kërcënimi kryesor për ekonominë
• Emigrimi, Hoxhaj: Institucionet në Britani të paafta për të trajtuar si problem