Inflacioni, qytetarët parashikojnë ulje më shpejt se bizneset e bankat

Qytetarët janë më optimistë se bizneset dhe agjentët financiarë kur vjen puna për nivelin e rritjes së çmimeve për vitin e ardhshëm.

Nga të dhënat e Bankës së Shqipërisë, konsumatorët parashikojnë që inflacioni pas 12 muajsh të jetë 4.59 për qind, më pranë nivelit neutral të synuar nga Banka e Shqipërisë, që është 3 për qind.

Bizneset dhe agjentët financiarë, ku përfshihen edhe bankat dhe institucionet e tjera financiare parashikojnë një nivel deri në tre herë më të lartë se ai që pritet nga qytetarët.

Sipërmarrjet thonë se rritja e çmimeve pas 12 muajsh do të jetë 10.6 për qind, ndërsa agjentët financiarë e parashikojnë rritjen me 9.6 për qind.

Banka e Shqipërisë parashikon nga ana tjetër që inflacioni të vijojë rritjen edhe në muajt e mbetur të këtij viti dhe të nisë stabilizimin në gjashtë muajt e para të vitit të ardhshëm. Për rikthimin e tij në nivele normale, Guvernatori Gent Sejko deklaroi se parashikohet tremujori i dytë i vitit 2024.

Për të frenuar rritjen e çmimeve, bordi mbikëqyrës i Bankës së Shqipërisë rriti normën e interesit në 2.75 për qind, ndërsa nuk përjashton mundësinë që kjo normë të shkojë në nivele 4 dhe 5 për qind.

LEXONI GJITHASHTU:

• BSH rrit normën e interesit, Sejko: Inflacioni, kërcënimi kryesor për ekonominë
• Inflacioni në Austri rritet me 11% në tetor
• Sondazhi: Inflacioni, shqetësimi kryesor i gjermanëve