Pensionistët në Vlorë të pakënaqur me indeksimin: Nuk mbulon rritjen e çmimeve

Indeksimi i pensioneve në vend ka bërë që pensionistët të presin në radhë në dyert e postës për të tërhequr paratë. Por shumica prej tyre shprehet se rritja është qesharake dhe nuk i kalon 450 lekë në rastin më të mirë. Duke e konsideruar tallje të radhës, ata tregojnë se indeksimi nuk u mundëson asgjë shtesë në përmirësimin e kushteve të jetesës.

“Ne flasim në vesh të shurdhër, ja unë vetë i dytë me gjithë gruan nuk më dalin, gruaja merr 100 mijë unë 200 mijë, nuk na dalin të paguajmë drita e ujë jo të ha e të pi. Prandaj ai i gjati mos të thotë jo ngrita pensionet, se pensionistët kanë dhënë djersën. M’u rrit 4 mijë lekë e 4 nusja 8 mijë lekë, me këto as një kg mish se marr dot”, thotë një pensionist.

“Ja ça bëhet këtu, ne vdiqëm, jam bërë ujë në djersë, ka radhë shumë, po jo kështu, t’i rregullojnë një çik. I marrim këto para duke vdekur. Aman me 4 mijë lekë ça do bëj, kemi fëmijë ça janë ato, një bukë. Pensionet janë të ulëta shumë, të gjitha pensionet, ça do hajë populli”, shprehet një tjetër.

Por ka edhe nga ata pensionistë që shprehen të kënaqur me shtesën e përfituar.

“Po të ketë rritje është mirë, sa të ketë mundësi shteti, ne e duam ashtu si është”, thotë një i moshuar

Mesatarja e pensioneve në Vlorë është 12 mijë lekë, teksa po të llogaritësh këtë shifër, sipas indeksimit, mesatarisht pensionistët e Vlorës këtë muaj kanë përfituar rreth 300 lekë.

LEXONI GJITHASHTU:

• Pensionet do të rriten nga tetori, shtesa nga indeksimi rreth 500 lekë në muaj
• 45 mijë pensione të llogaritura gabim, hapen kërkesat për korrigjimin