“Përjashtimi nga Defender, jo i drejtë”, Kryeministri Kurti komenton vendimin e SHBA

Kryeministri i Kosovës, Albin Kurti ka komentuar përjashtimin e Kosovës nga stërvitja ‘Defender 2023’. Në një intervistë për Bloomberg, Kurti e ka quajtur këtë veprim të Shteteve të Bashkuara të Amerikës si të padrejtë.

Kryeministri i Kosovës, Albin Kurti, në një intervistë për gazetën prestigjioze amerikane, Bloomberg, e ka cilësuar si “jo të drejtë” përjashtimin e Kosovës nga stërvitja ushtarake ndërkombëtare i udhëhequr nga NATO “Defender Europe 23”, si pasojë e parë për Qeverinë e Kosovës pas vendimit për të vendosur kryetarët e sapozgjedhur në katër komunat veriore nën asistencën e Policisë së Kosovës.

“Nuk është në rregull të bullizohet Kosova. Sa herë që Shtetet e Bashkuara të Amerikës kërkojnë diçka nga ne, ne nuk pyesim pse, por vetëm kur dhe si”, ka thënë Kurti kur u pyet për presionin që komuniteti ndërkombëtar po ushtron mbi Kosovën për situatën në Veri të Kosovës’ u shpreh Kurti.

DASH-i dënoi atë çfarë ndodhi në Veri duke vënë në pikëpyetje edhe marrëdhëniet në mes të Kosovës dhe SHBA-së.

Megjithatë Kurti, në intervistë, thotë se nuk do të tërhiqet nga vendimi i tij, pavarësisht presionit në rritje nga SHBA-ja dhe BE-ja.

“Serbia duhet të ndërpresë mbështetjen për milicinë që shkaktoi protesta në Veri të Kosovës dhe përgjegjësit duhet të ndiqen penalisht përpara se qeveria ime të shqyrtojë lehtësimin e qëndrimit. Ne nuk mund t’i nënshtrohemi si një republikë demokratike kësaj milicie të dhunshme. Ne duam që gjërat të zgjidhen sa më shpejt të jetë e mundur, por ju e dini se kjo nuk varet vetëm nga ne”,-ka shtuar kryeministri i Kosovës.

LEXONI GJITHASHTU:

• Krisja e marrëdhënies Rama-Kurti! Politologu Spahiu: Ja kush është përgjegjës
• Si futen drogat sintetike në Shqipëri? Softa: Jugu është kthyer në pikë-shitje