Përmeti destinacion turistik, në 2022-shin e vizituan 60 mijë turistë

Përmeti gjithmonë e më tepër po merr profilin e një destinacioni turistik tërheqës për vizitorët vendas dhe të huaj. Tashmë turizmi është bërë pjesë e qëndrueshme e ekonomisë lokale.

I njohur ndryshe edhe si “Qyteti i luleve”, Përmeti po mirëpret më shumë turistë duke e kthyer këtë sektor ndër prioritarët për sigurimin e të ardhurave ekonomike për banorët.  Në Zyrën e Punës në këtë bashki konstatohet interes nga bizneset për punësimet në sektorin e turizmit.

“Turizmi është duke u zhvilluar shumë në bashkinë e Përmetit dhe vendet e lira të punës dhe bizneset kanë nevojë  për forcë punëtore. Kemi hapur aktualisht  20 vende  të lira ku kërkohen kamerierë, ndihmës kuzhinierë dhe pastruese në sektorin e turizmit kryesisht në hoteleri” ,-tha Anxhela Rrapaj, specialiste e zyrës së punës.

 “Përsa i përket ekonomisë lokale tashmë Përmeti është  futur në rrugën e turizmit  dhe shumica e investitorëve po investojnë në rrugën e turizmit. Gjithashtu mund të themi se janë edhe shumë  persona, të cilët janë rikthyer përsëri në Përmet dhe po i rikthejnë  shtëpitë e tyre në bujtina pasi ekonomia e Përmetit është gjithmonë e lidhur me turizmin”,-tha Ledion Komino, përgjegjës i turizmit në Bashkinë Përmet.

Përgjatë vitit 2022, qyteti i Përmetit u vizitua nga rreth 60 mijë turistë, shumica e të cilëve të huaj. Këtë vit synohet një numër më të lartë vizitorësh dhe më shumë të ardhura nga turizmi.

 “Me këto investime që janë bërë presim që numri i turistëve  këtë verë , në territorin e Përmetit, si në pavionet muzeale që janë çelur apo si dhe në atraksionet turistike që Përmeti mbart do të kemi një numër shumë të lartë dhe një numër të konsiderueshëm turistësh”,-tha Ledion Komino, përgjegjës i turizmit në Bashkinë Përmet.

Zona e Përmetit përfshin resurse të veçanta natyrore, historike dhe të trashëgimisë kulturore në shërbim të zhvillimit të turizmit të qëndrueshëm.

LEXONI GJITHASHTU:

• Mungesa e fuqisë punëtore, Topuzi: Studentët nuk duan shkollat profesionale
• Supersfida Manchester City-Liverpool, Haaland mungesa e madhe
• Përsëritet tragjedia në SHBA, 5-vjeçari vret me armë vëllain 16-muajsh