Përndiqte dhe kanoste me llogari false 37-vjeçaren, arrestohet autori në Fushë-Krujë

Policia e Tiranës këtë të enjte ka arrestuar një 28-vjeçar, pasi dyshohet se ka përndjekur dhe kanosur në rrjete sociale, nëpërmjet disa llogarive false një 37-vjeçare.

Sipas raportimeve nga policia, rasti ishte i kallëzuar nga vetë 37-vjeçarja se përndiqej dhe kanosej në rrjete sociale, veprime të cilat i kishin shkaktuar ankth dhe panik.

Njoftimi i plotë i policisë:

DVP Tiranë/Finalizohet operacioni i koduar “Insistimi”.

I shkaktoi ankth dhe panik, një 37-vjeçareje, duke e përndjekur dhe kanosur në rrjete sociale, nëpërmjet disa llogarive false, arrestohet 28-vjeçari.

Sekuestrohen 2 celularët në të cilët i arrestuari kishte aktivizuar llogaritë.

Si rezultat i administrimit të shpejtë të kallëzimit të një shtetaseje, se përndiqej dhe kanosej në rrjete sociale, veprime të cilat i kishin shkaktuar ankth dhe panik, specialistët e Sektorit për Hetimin e Krimeve Kibernetike, në bashkëpunim me shërbimet e Komisariatit të Policisë Krujë, në kuadër të operacionit “Insistimi”, mundësuan lokalizimin dhe vënien në pranga të autorit të dyshuar të rastit, shtetasit L. K., 28 vjeç, banues në fshatin Halilaj, Fushë Krujë.

Nga kontrollet në 2 celularët e tij, u gjetën të aktivizuara llogari false, në platformat “Instagram” dhe “TikTok”, nëpërmjet të cilave 28-vjeçari përndiqte dhe kanoste 37-vjeçaren.

Materialet procedurale iu referuan Prokurorisë së Tiranës, për veprime të mëtejshme.