Aristir Lumezi, zëvendëskryeredaktor i gazetës ‘Panorama’, në studion e Ilva Now në Euronews Albania, teksa komentoi aktualitetin politik në vend pas përplasjes së re mes qeverisë dhe Presidentit dhe thirrjen e këtij të fundit për një tubim popullor më 2 mars, tha se e gjitha kjo është një luftë për pushtet nga të dyja krahët.

Sipas tij, kreu i shtetit ka zgjedhur momentin më të papërshtatshëm për të bërë këtë thirrje, pikërisht pas një konference të suksesshme donatorësh që do të ndihmojnë vendin të rimëkëmbet pas tërmetit dhe para vendimit për hapjen e negociatave me  BE, që duket se do të jetë pozitiv për vendin.

“Në mars kemi hapjen e negociatave dhe nëse Shqipëria do të jetë në kaos politik, donatorët do thonë stop ndihmave, negociatorët do thonë vendosni një herë dialog me njëri-tjetrin.

Unë pres që të ketë telefonata të forta që ky lloj proklamimi për një përshkallëzim të tillë proteste të mos ndodhë. Mungesa e dialogut gjithmonë ka sjellë këto lloj përplasjesh”, – tha z. Lumezi.