Përplasjet Shqipëri-Kosovë, Osmani: Jemi një familje, vështirësitë i kalojmë bashkë

Presidentja e Kosovës, Vjosa Osmani mbajti një deklaratë për mediat krah homologut shqiptar, Bajram Begaj, konferenca e parë gjatë vizitës 2-ditore në Shqipëri.

Në fjalën e saj, Osmani theksoi nevojën për të qenë të koordinuar sa i takon strategjisë për sigurinë duke qenë se kjo pikë është e rrezikuar, me Serbinë që kërkon gjithnjë destabilitet.

Sipas saj Shqipëria dhe Kosova janë një familje dhe kur ka probleme duhet t’i zgjidhin me njëra-tjetrën në mënyrë që t’i bëjnë ballë sfidave.

“Kosova sot përballet me sfidën më të madhe në aspektin e sigurisë në këto 25 vitet e fundit. Si një njeri që ka qenë i angazhuar në institucionet publike të Kosovës nga viti 99’, e them me plot besim kur kemi përballje me sfida të tilla, kur kemi agresion të përditshëm institucional e të sigurisë nga ana e një fqinji agresiv i cili akoma vazhdon me logjikën e zhdukjes sonë nga faqja e dheut, atëherë është detyrim i secilit prej nesh që interesat kombëtare t’i vëmë para së gjithash, të koordinohemi në baza ditore, të flasim me një zë e të unifikuar. Unë nuk kam asnjë dyshim se qëllimin të gjithë e kemi të përbashkët. Nëse ndonjëherë kemi ndonjë dallim në strategji, atëherë duhet të ulemi dhe t’i tejkalojmë ato si një familje sepse një familje jemi,” – u shpreh Osmani.

LEXONI GJITHASHTU:

• Osmani: Përballemi me sfidën e sigurisë, kemi nevojë për mbështetjen e Shqipërisë
• Begaj konferencë me Osmanin: Dialogu, rruga e paqes. Shqipëria mbështet Kosovën