Përroi i ‘plehrave’ në Elbasan, banorët ankohen për mungesën e investimeve

Pamjet nuk kanë nevojë për koment, pasi duket qartë që është i mbushur me plehra dhe kundërmon erë të rëndë.

Përgjatë zonës jetojnë pjestarë të komunitetit rom. Ata ndihen të diskriminuar nga pushteti lokal që prej vitesh nuk rehabiliton lagjen ku jetojnë.

“Meqënëse jemi Rom këtu ne na nenvlerësojnë e gjithe bashkia Elbasanit, që këtu nuk hapim dot dritaret se mbytemi nga aroma e keqe e plehrave dhe ujërave të zeza që derdhen në manasdere.”

“Shqetësime kemi ne që kur ka hyrë demokracia ne nuk kemi parë një të mirë nga bashkia, nga qeveria, një investim”, thanë banorët.

Kreu i klubit ekologjik në Elbasan, Ahmet Mehmeti ngre shqetësimin e sëmundjeve që mund të shkaktojnë mbetjet përgjatë përroit.

“Duhet vene dorë patjetër, organet kompetente që merren me pastertinë e qytetit duhet t’i japin patjetër një zgjidhje sepse këtu është një rrezik i madh, qoftë për sëmundjet, por edhe për pamjen që është skandaloze”, theksoi ai.

Për drejtorin e Agjencisë së Shërbimeve Publike në bashkinë e qytetit, Edvin Palloshi ekziston projekti për rehabilitimin e zonës, por mungojnë fondet.

“Ka një projekt që i është nisur ministrisë së Bujqësisë, është një projekt që kap vlerën 1.2 milion euro dhe pret miratimim për financimin nga ana e qeverisë. Gjatë kësaj periudhe në jemi duke e mbajtur kanalin në kontroll të vazhdueshëm”, tha ai.

Përkundrejt kësaj problematike, banorët tregojnë se në këtë lagje nuk vihet dore prej më shumë se 27 vitesh.

LEXONI GJITHASHTU

• Djegia e tonelatave me plehra në Shijak, Meta: Krim mjedisor
• 1 mln euro për pastrimin e plazhit, periferia e Durrësit mbushur me plehra