Personat me të ardhura të larta mund të taksohen 28%, thotë eksperti Xhepa

Eksperti i ekonomisë, Selami Xhepa deklaroi se personat me të ardhura të larta mund të taksohen në shifrën 28%.

Në emisionin “Mirëmëngjes” në “Euronews Albania”, eksperti tha se pritet edhe një riklasifikim të kategorive të të punësuarve, ku përfshihen edhe të vetëpunësuarit.

“Një taksë shumë e lartë, mendohet se do të jetë 28% për ata që kanë të ardhura shumë të larta. Pritet të ketë një riklasifikim të kategorive të të punësuarve, duke përfshirë edhe të vetëpunësuarit”, tha Xhepa.

Ai e cilësoi si një gangrenë të politikbërjes në vend, ndryshimin e shpeshtë të ligjeve tatimore.

Xhepa u shpreh se kjo praktikë është shumë e dëmshme jo vetëm për bizeset por edhe për qytetarët.

“Është gangrena e përhershme në Shqipëri. Ligjet që ndryshojnë më shpesh në Shqipëri,kanë qenë ligjet tatimore. Është praktika më e keqe, më e shëmtuar, më e dëmshme për bizneset por edhe për qytetarin e thjeshtë. Ligjet tatimore në Shqipëri, janë gangrena e politikbërjes në vend”, u shpreh ai.

Sipas ekspertit, qeveria do të rishikojë barrën tatimore për grupe të caktuara shoqërore, bazuar edhe te rekomandimet e Fondit Monetar Ndërkombëtar.

LEXONI GJITHASHTU

• Qytetarët do të paguajnë taksa një herë në vit

• Zero taksa nga të pasurit, të ardhurat nga dividenti bien në rekorde historike