Peshkimi merr 4.6 mln euro, rritet fondi për investime e subvencione

Buxheti i vitit 2024 do të ndajë për sektorin e peshkimit 473 mln lekë, ose 4.6 mln euro. Kjo shumë është rreth 15% më e madhe se vitin e kaluar dhe shkon për të inkurajuar sipërmarrjen vendase të investojë në peshkim.

Konkretisht me llogaritjet dhe zërat përkatës, mbështetja financiare do të mundësojë investime në zgjerimin e kapaciteteve ankoruese në portet kryesore të vendit, si dhe  do të vihet në dispozicion skema kombëtare e mbështetjes për të vazhduar me rinovimin e flotës së peshkimit.

Ministria e Bujqësisë thotë se objektivat e vitit 2024 për këtë sektor i bashkohen standardeve të Bashkimit Europian që nga licencat, konkurrenca, ruajtja e produktit, deri në tregtimin e tij brenda dhe jashtë vendit.

Në programin buxhetor preket edhe inspektimi, ku ministria synon rritjen e numrit të kontrollove të inspektoriatit të peshkimit në subjektet e peshkimit nga 2300 në vitin 2023 në 2450 në vitin 2026.

Peshkimi është një ndër sektorët më të formalizuar në vend, prej të cilit Shqipëria eksporton rreth 130 milionë euro në vit, por një nga problemet qe hasin kompanitë sot, është mungesa e punonjësve vendas, të cilët janë zëvendësuar nga peshkatarë të huaj, kryesisht egjiptianë dhe turq.

LEXONI GJITHASHTU:

• Si ndahet buxheti 2024 për pushtetin lokal, kush janë bashkitë me fondet më të ulëta
• Buxheti 2024, si ndahen paratë: 105 mln euro për pagat, 73 mln për pensionet