Petkoviç: Serbët duan formimin e Asosacionit, jo dokumentet e Kosovës

Drejtori i zyrës për Kosovën në qeverinë e Serbisë, Petar Petkoviç thotë se serbët duan formimin e Asosacionit në Kosovë dhe jo dokumentet sipas reciprocitetit, që ai i konsideron të rreme.

Sipas Petkoviç, zëvendëskryeministri dhe kryenegociatori i Kosovës, Besnik Bislimi e ka humbur kredibilitetin për të folur për procesin e dialogut dhe marrëveshjet e arritura, shkruan B92.

“Ajo që duan serbët është bashkimi i Komunave Serbe me të gjitha pushtetet dhe kompetencat ekzekutive siç është rënë dakord me Marrëveshjen e Parë të Brukselit të vitit 2013 dhe Marrëveshjen për Parimet e Përgjithshme të vitit 2015 dhe jo siç do të dëshironte Bislimi, duke e krahasuar Asosacionin me një organizatë jo qeveritare”, theksoi ai.

Petkoviç u shpreh se pas marrëveshjes për energjinë, kryeministri Albin Kurti dhe Besnik Bislimi shkuan në drejtim të lëvizjeve të njëanshme dhe veprimeve të dhunshme, duke shmangur dialogu.

Ndërsa, ditën e djeshme, i dërguari i Posaçëm i Shteteve të Bashkuara për Ballkanin Perëndimor, Gabriel Escobar deklaroi se krijimi i Asociacionit të komunave me shumicë serbe nuk duhet të jetë në kundërshtim me Kushtetutën e Kosovës dhe të krijojë “shtet brenda shtetit”.

Escobar tha se duhet të ketë diskutim për çështjen e Asociacionit, që të mos bie ndesh me ligjet dhe shtoi se SHBA pret që të zbatohen të gjitha marrëveshjet e arritura në kuadër të dialogut Kosovë-Serbi.

LEXONI GJITHASHTU

• Asociacioni nuk duhet të jetë shtet brenda shtetit të Kosovës, thotë Escobar

• Petkoviç: Shpresoj që Kosova ta marrë seriozisht dialogun në Bruksel

• Kurti dhe Vuçiç do të takohen në Bruksel