PL denoncon në prokurori grabitjen e selisë: Morën rrjetin e komunikimeve

Partia e Lirisë ka depozituar një kallëzim në Prokurorinë e Tiranës, ku njofton vjedhjen nga persona të pautorizuar të rrjetit të komunikimeve elektronike brenda selisë së saj.

Lajmi është bërë publik përmes një postimi në facebook nga nënkryetari i kësaj force politike, Petrit Vasili.

Në kallëzim, që mban firmën e Ilir Metës, thuhet se në zyrat e PL janë grabitur gjatë mesnatës, ku disa persona të paautorizuar kanë marrë një pajisje elektronike (hard-disc), si dhe kanë kryer dëmtime dhe këputje të linjave kabllore.

“Partia e Lirisë është përballur me një ngjarje të tipit mafioz, karakteristike e “Rilindjes”, që kërkon të Qeverisë vetëm përmes shantazhit dhe presionit.

Në zyrat e saj kanë hyrë në mesnatë persona të paidentifikuar dhe të paautorizuar duke grabitur rrjetin e komunikimeve elektronike, një paisje DVR (hard disc) si dhe në mënyrë të fshehtë kanë kryer lidhje, dëmtime dhe këputje të linjave kabllore.

Partia e Lirisë në respekt të ligjit ka depozituar denoncimin e kësaj ngjarjeje në Prokurorinë e Tiranës për hetimin dhe identifikimin e autorëve.

As kjo tentativë dhe asnjë presion nuk e ul dot ritmin dhe vendosmërinë e Partisë së Lirisë për t’u përballur me “Rilindjen” dhe mashat e saj, por përkundrazi shumëfishon energjitë e saj në betejën për përmbysjen e narkoqeverisjes rilindase”, shkruan Vasili.

LEXONI GJITHASHTU:

• Pse nuk ka qenë në protestat e Berishës? Përgjigjet Ilir Meta
• Ilir Meta: Janë mbyllur 12 mijë biznese, dëshmi e situatës së rëndë ekonomike