Plagosja e 43-vjeçarit në Shkodër, arrestohet një nga personat në kërkim

Policia e Shkodrës ka arrestuar një 25-vjeçar, të shpallur në kërkim për armëmbajtje pa leje dhe prishje të qetësisë publike.

Shtetasi A. L., banues në fshatin Pult, u arrestua në fshatin Grud e Re, pas informacioneve të marra nga inteligjenca policore për lokalizimin dhe kapjen e personave të shpallur në kërkim.

Ky i fundit ishte shpallur në kërkim nga Gjykata e Shkallës së Parë të Shkodrës, e cila kishte caktuar masën e sigurisë “Arrest në burg” për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prishja e qetësisë publike”.

Ngjarja që i ka sjellë atij këto akuza ka ndodhur më 13 gusht 2024, në fshatin Postribë, ku gjatë një konflikti për motive të dobëta ndërmjet disa shtetasve, një 43-vjeçar ka mbetur i plagosur me armë zjarri.

Policia ka nisur kërkimet edhe për dy shtetas të tjerë të shpallur në kërkim lidhur me këtë ngjarje. Hetimet vijojnë nën drejtimin e Prokurorisë së Shkodrës për të përcaktuar përgjegjësinë penale të çdo të implikuari në këtë rast.

Materialet procedurale janë dorëzuar në Prokurori për veprime të mëtejshme.

• “Licët s’i hapën dyert e mortit”- Lala: E sigurt që në makinë ishte 1 person i tretë
• Qitësit ishin 2, iu afruan me Range Rover: Si ndodhi maskara me 3 viktima në Shkodër