Plani franko-gjerman, Kurti e diskuton me përfaqësuesit e shqiptarëve në Serbi

Kryeministri i Kosovës, Albin Kurti, ka diskutuar me përfaqësuesit e shqiptarëve dhe boshnjakëve në Kuvendin e Serbisë, propozimin e Bashkimit Evropian për normalizimin e marrëdhënieve me Beogradin.

Deputeti shqiptar, Shaip Kamberi, kryetari i partisë SDA Sanxhak, Sulejman Ugljanin, dhe dy deputetët tjerë boshnjakë: Enis Imamoviq dhe Sellma Kuçeviq, u pritën këtë të shtunë nga Kurti në Prishtinë.

I pranishëm në takim ishte dhe ministri i Kulturës, Rinisë dhe Sportit, Hajrulla Çeku,

Në një njoftim për media, Zyra e Kryeministrit ka thënë se “komunitetet e ndryshme pa dallim duhet të trajtohen në kuadër të principeve universale e në harmoni të plotë me standardet e Bashkimit Evropian” dhe se të drejtat e komuniteteve joshumicë në Kosovë dhe Serbi, pasqyrojnë “demokracinë dhe zhvillimin tonë si shoqëri”.

Katër zyrtarët kanë thënë se janë të pakënaqur me statusin e shqiptarëve dhe boshnjakëve në përgjithësi në Serbi, por kanë theksuar situatën në komunat e Novi Pazarit, Tutinit e Sjenicës në Sanxhak si dhe të Preshevës, Medvegjës e Bujanocit në Luginë.

“Ata kërkuan reciprocitet të të drejtave me serbët në Republikën e Kosovës”, është thënë në komunikatë.

LEXONI GJITHASHTU

• “As mos të të shkojë ndërmend”, Vuçiç paralajmëron deputetin shqiptar në Serbi
• Kuvendi i Serbisë miraton raportin për procesin e negociatave me Kosovën
• “Turqia ofron mbështetje për paqen në Ballkan”, Kurti takon Erdoganin