Plani i paqes në Ukrainë, Witkoff të martën takohet me Putin në Moskë

Kremlini ka njoftuar këtë të hënë se i dërguari i Donald Trump, Steve Witkoff do të takohet pasditen e së martës, me presidentin rus Vladimir Putin në Moskë. Ky takim do të zhvillohet për të vazhduar bisedimet mbi planin amerikan që synon t’i japë fund luftës në Ukrainë.

“Takimi me Witkoff është planifikuar për nesër”, tha zëdhënësi i Kremlinit, Dmitry Peskov gjatë konferencës së tij me gazetarët.

Vizita e Witkoff në Rusi do të zhvillohet pas negociatave të dielën në Florida, midis delegacioneve amerikane dhe ukrainase, të cilat u përshkruan si produktive nga Sekretari i Shtetit i SHBA-së, Marco Rubio.

Kremlini gjithashtu e përshkroi sulmin ukrainas gjatë fundjavës mbi infrastrukturën e Konsorciumit të Gazsjellësit Kaspik (CPC) si skandaloz. CPC, e cila ka aksionarë nga Rusia, Kazakistani dhe Shtetet e Bashkuara, njoftoi të shtunën se një nga tre vendet e saj të ankorimit në terminalin e Novorossiysk në Rusi u dëmtua nga një sulm nga një dron ukrainas dhe se operacionet ishin ndalur.

Zëdhënësi i Kremlinit, Dmitry Peskov kritikoi sulmet ukrainase me anije sipërfaqësore pa pilot ndaj cisternave të naftës në Detin e Zi, të cilat ai i quajti sulme ndaj interesave të Turqisë dhe pronarëve të anijeve.

LEXONI GJITHASHTU:

• Rama: Vendimi i GJKKO për zv/kryeministren cënon ekzekutivin, beteja institucionale
• Një sinjal nga SHBA/ Java kur Evropa e kuptoi se qëndron e vetme kundër Rusisë