Bashkimi Europian do të ndajë 6 miliardë euro në Ballkanin Perëndimor. Parlamenti në Bruksel është pranë miratimit, dhe data e mundshme e kalimit të fondit është 16 tetori.

Sipas shteteve, Bosnja dhe Herzegovina do të marrë 1.85 miliardë euro, Serbia 1.58 miliardë, Shqipëria 922 milionë euro, dhe më tej Kosova, Maqedonia e Veriut dhe Mali i Zi do të përfitojnë pjesën tjetër të fondit. Ndërkohë, Plani i Rritjes, i cili do të zhvillohet me dy faza, nis me një financim paraprak, ku vendi ynë do të marrë 64.5 milionë euro.

Me këtë paketë, BE-ja synon të ndihmojë rritjen ekonomike në vendet e rajonit dhe në këtë mënyrë ta përshpejtojë procesin e integrimit të tyre në Europë.

Në terma konkretë, Brukseli thotë se plani i rritjes ka mundësinë të dyfishojë madhësinë e ekonomive brenda 10 viteve të ardhshme, ndërsa qasja e tij është konceptuar si një garë.

Ato vende që paraqesin projekte serioze për investim, dhe ku performanca anti-korrupsion është më e mirë, do të tërheqin më shumë para. Në rast se kushtet nuk plotësohen, Komisioni Europian e redukton ose rimerr pagesën mbrapsht.

Nga shuma e përgjithshme, 2 miliardë euro do të jenë dhuratë, ndërsa 4 miliardë euro në formën e kredive të favorshme.

LEXONI GJITHASHTU:

• Anëtarësimi i Shqipërisë në BE, hapet të mërkurën kapiulli i parë! Zbardhet agjenda
• Opozita bojkoton Komisionet, PS miraton udhërrëfyesin për integrimin në BE