Plehrat ‘pushtojnë’ Gjirokastrën, qytetarët depozitojnë mbetje ku të munden

Depozitimi i mbetjeve urbane larg vendgrumbullimeve është kthyer në shqetësim në qytetin e Gjirokastrës. Një pjesë e banorëve i hedhin plehrat përgjatë shtretërve të lumenjve, segmenteve rrugore apo dhe kodrinave të qytetit duke shkaktuar ndotje.

Hedhja e mbeturinave vend e pavend, përveç anës estetike të qytetit, shkakton edhe përhapjen e shumë sëmundjeve duke vënë në rrezik shëndetin e qytetarëve.

Ky fenomen është shqetësues kryesisht në zonën muzeale të qytetit, ku disa zona janë pushtuara nga plehrat duke dëmtuar edhe imazhin turistik të qytetit.

Ndërmarrja e shërbimeve publike thekson se ndërhyrja në disa zona është e domosdoshme.

 “Brigadat e pastrimit janë hapur në të gjithë qytetin për pastrimin e çdo lloj rrugice, e përrenjve që ne kemi problem që nga njerëz të pandërgjegjshëm po na hedhin mbetjet e tyre ne vendet jo të caktuara”,-tha specialisti i mjedisit Artur Xarba.

Çelja e sezonit turistik kërkon edhe mbështetjen e qytetarëve dhe ndërgjegjësimin e tyre për të mbajtur pastër qytetin.

 “I bëj një thirrje gjithë qytetarëve të Gjirokastrës meqenëse së shpejti hapet edhe sezoni turistik  të mos na hedhin mbetjet në vendet  jo të caktuara”,- tha specialisti i mjedisit Artur Xarba.

Sensibilizimi i qytetarëve është i domosdoshëm, sepse institucionet publike dhe organizatat për mbrojtjen e mjedisit theksojnë se një pikë e fortë e zhvillimit të turizmit është ambienti I pastër dhe mbrojtja e natyrës.

LEXONI GJITHASHTU:

• 17-vjeçari vdes nga overdoza, rrëfehet ish-përdoruesi: Drogën e gjen kudo në Tiranë
• A do ta shtyp Putin butonin bërthamor? Fituesi i çmimit Nobel: Nuk ka më siguri
• “Hashashin e kam filluar që 10 vjeç”,ish-përdoruesi: Kur pi i harron me nënë e babë