Po plotësojmë me landfille çdo rajon, thotë ministrja e Mjedisit

Mirela Kumbaro, ministre e Mjedisit dhe Turizmit deklaroi në “Now” se po plotësojnë me landfille çdo rajon.

Ajo theksoi se është përgjegjësi që të luftojnë më mbetjet e 30 viteve sepse duke u fokusuar te mbetjet që prodhohen çdo ditë, po harrohet pjesa tjetër.

“Mbetjet që të quhen të menaxhuara në mënyrë të plotë, shkojnë nga koshi deri në një pikë fundore,” – tha Kumbaro.

Ministrja përmendi landfillin e Bushatit, të Maliqit, të Bajkajt apo atë të Vlorës që është drejt përfundimit, ndërsa nënvizoi se investimet për menaxhimin e mbetjeve janë shumë të shtrenjta.

“Në çdo bashki nga më e vogla deri te ajo e Tiranës kostoja e menaxhimit të mbetjeve është shumë më e lartë sesa tarifa që paguajmë ne në vit për menaxhimit,” – u shpreh Kumbaro ndërsa theksoi se ekziston mundësia për një rritje të çmimit të tarifës.

Ministrja solli në vëmendje dhe shifrat nga INSTAT të cilat sugjerojnë se 86% e popullsisë shërbehet me mbledhje të mbetjeve, ndërsa 63% me pikë fundore. Puna e qeverisë në 8 vite, sipas saj nuk është mjaftueshëm, por duke përdorur metodën e reduktimit të mbetjeve dhe riciklimit puna do të bëhet më e lehtë.

Kumbaro sqaroi se shumë shpejt në komisariatin dixhital do të futen dhe denoncimet për çështjet e krimit mjedisor.