Një 42-vjeçar është arrestuar nga policia e Tiranës pasi u kap duke qarkulluar i armatosur në rrugët e kryeqytetit.
Martin Vukaj, banues në Paskuqan, u lokalizua falë inteligjencës policore në rrugën “Dine Hoxha”, ku gjatë kontrollit të tij u gjet dhe u sekuestrua një pistoletë me krëhër dhe municion luftarak.
Operacioni “Driver 2” u realizua nga Shërbimi i Forcës së Posaçme “Shqiponja” në bashkëpunim me Komisariatin e Policisë Nr. 3.
Vukaj u arrestua për veprat penale “Mbajtja pa leje dhe prodhimi i armëve dhe municionit”.
Materialet në ngarkim të tij i kaluan Prokurorisë së Tiranës për veprime të mëtejshme.
“Shërbimet e Sektorit të Forcës së Posaçme “Shqiponja” në bashkëpunim me Komisariatin e Policisë Nr. 3, në vijim të punës për goditjen e paligjshmërisë në fushën e armëmbajtjes pa leje, bazuar dhe në inteligjencën informative për një shtetas që qarkullonte i armatosur në rrugën “Dine Hoxha”, menjëherë kanë organizuar punën për kapjen e tij dhe kanë finalizuar operacionin policor të koduar “Driver 2”. Gjatë operacionit u arrestua në flagrancë shtetasi M. V., 42 vjeç, banues në Paskuqan, për veprën penale “Mbajtja pa leje dhe prodhimi i armëve, armëve shpërthyese dhe i municionit””, thuhet në njoftimin e policisë.
LEXONI GJITHASHTU:
- Dhunoi vajzën e tij të mitur, arrestohet 45-vjeçari në Tiranë
- I shpallur në kërkim për vrasje në tentativë, arrestohet 41-vjeçari
