Po qarkullonte me kallashnikov me vete, arrestohet 20-vjeçari

Një 20-vjeçar është arrestuar nga policia e Rroskovecit, pas informacioneve të marra se po qarkullonte me një kallashnikov në kodrat e liqenit të fshatit Kurjan.

Pas arrestimit në flagrancë, policia ka ushtruar kontrolle në banesën e 20-vjeçarit, ku gjetën dhe sekuestruan një sasi municioni luftarak.

Materialet procedurale në ngarkim të tij i kaluan Prokurorisë pranë Gjykatës së Rrethit Gjyqësor Fier, për veprime të mëtejshme.

“Shërbimet e Stacionit të Policisë Roskovec, bazuar në inteligjencën informative se një 20-vjeçar mbante armë zjarri automatik pa leje dhe qarkullonte në kodrat e liqenit të fshatit Kurjan, kanë organizuar dhe finalizuar operacionin policor të koduar “Liqeni”.

Në kuadër të operacionit, u kap në kodrat e liqenit të Kurjanit, shtetasi E. H., 20 vjeç, banues në Rroskovec, i cili sapo ka parë shërbimet e Policisë, ka tentuar të fshehë armën e zjarrit automatike PMSH, por nuk ka mundur dot pasi është kapur në flagrancë”, njofton policia.