Sekuestrohen 160 kg kokainë me vlerë 20 milion €, arrestohen dy shqiptarë në Itali

Dy persona me origjinë shqiptare janë arrestuar në provincën e Bergamos, Itali, gjatë një operacioni të Guardia di Finanza, pasi u kapën duke trafikuar mbi 160 kilogramë kokainë të pastër të fshehur në një kamion tip TIR. Lënda narkotike, e ndarë në 150 pako, vlerësohet se do të sillte fitime prej rreth 20 milionë euro në tregun e paligjshëm.

Operacioni u zhvillua në kuadër të kontrollit të koordinuar nga Njësia e Policisë Ekonomike dhe Financiare e Brescias, në zonat industriale dhe tregtare të Bergamos dhe Brescias, të cilat konsiderohen me interes të lartë hetimor. Forcat e rendit vëzhguan lëvizje të dyshimta të një kamioni të parkuar dhe ndërhynë kur drejtuesi i tij dorëzoi shtatë çanta me drogë te një automjet tjetër.

Të dy shtetasit shqiptarë u arrestuan dhe u transferuan në burgun e Bergamos, ndërkohë që hetimet vazhdojnë për të zbuluar rrjetin e organizuar të trafikut, i cili besohet se lidhet edhe me tregjet ndërkombëtare, përfshirë Amerikën Latine.