Pogradec, nis shpërndarja e ndihmave për 62 familjet e prekura nga përmbytjet

Pas motit të keq dhe shirave të rrëmbyeshëm që prekën vendin tonë gjatë kësaj jave, Bashkia Pogradec, në bashkëpunim me Emergjencat Civile, ka nisur shpërndarjen e paketave me ndihma ushqimore për familjet e prekura nga përmbytjet.

Vetëm në qytetin e Pogradecit do të furnizohen me paketa ushqimore 62 familje, të cilat kanë pësuar dëme të shumta në banesat e tyre si pasojë e vërshimeve të ujit.

Ndërkohë, sipas Sekretarit të Përgjithshëm të Bashkisë Pogradec, Dritan Babasuli, në fshatin Rëmenj janë evakuuar 6 familje, të cilat do të përfitojnë bonus qiraje nga bashkia deri në momentin që banesat e tyre të rikonstruktohen dhe të bëhen sërish të banueshme.

Nga verifikimet paraprake në terren rezulton se janë prekur rreth 62 banesa, ndërsa janë evakuuar 6 familje. Janë dëmtuar gjithashtu 7 ura, si dhe është prekur rrjeti rrugor në disa akse, përfshirë rrugën për në fshatin Grunjas dhe rrugë dytësore në zonat rurale të njësive administrative Çërravë, Buçimas dhe Mokër.

Ndërkohë, Bashkia Pogradec ka bërë me dije se situata vijon të monitorohet dhe ekipet janë në terren për vlerësim të plotë të dëmeve dhe ndërhyrje sipas nevojës.

LEXONI GJITHASHTU:

• Moti i keq, Vengu nga Saranda: 1 500 hektarë nën ujë, vijon inventarizimi i dëmeve
• Pas ditëve me shi, në Qafë Thore dhe Razmë nisin reshjet e borës