Poli Hoxha: Arrestimet e IT, për t’i vënë kapakun skandalit me sulmet kibernetike

Gazetari Poli Hoxha deklaroi se firmosja e urdhër-arresteve nga Prokuroria e Tiranës për  5 punonjësit IT pranë Departamentit të Administratës Publike (DAP), është thjesht për t’i vënë kapakun skandalit për sulmet kibernetike.

Në një intervistë për Euronews Albania, Hoxha u shpreh se edhe pas kësaj ngjarjeje, nuk po sheh reflektim nga shteti shqiptar.

“Këta kanë kapur pjesën e Departamentit të Administratës Publike. Kjo është pjesa e e-Albania. Ne kemi parë që këtu janë goditur, përveç e-Albania, është goditur shërbimi informativ, është goditur policia, të cilat nuk janë pjesë e rrjetit të të dhënave që përpunohen nga e-Albania. Ideja është që, kjo po më duket si një kapak për skandalin e radhës”, theksoi ai.

Që prej vitit 2021, Shqipëria ka rënë pre e sulmeve kibernetike. Një sulm kibernetik u shënua më 15 korrik të këtij viti, që bllokoi të gjitha faqet zyrtare shtetërore dhe platformën e shërbimeve online e-Albania.

Ndërkohë, më 14 shtator u sulmua sistemi TIMS në të gjitha pikat kufitare të vendit. Për këto sulme Shqipëria ka fajësuar Iranin dhe ka ndërprerë marrëdhëniet diplomatike me këtë shtet.

Të dhëna konfidenciale të personave publikë, që nga kreu i SHISH deri tek kryeministri, janë publikuar herë pas herë nga hakerat në faqen “Homeland Justice”.

2 ditë më parë, hakerat iranianë publikuan një listë me të dhënat e patentave të shtetasve shqiptarë në rrjetin social Telegram.

LEXONI GJITHASHTU

• EMRAT| Kush janë 5 punonjësit e DAP të arrestuar për sulmet kibernetike
• Sulmet kibernetike ndaj sistemeve shtetërore, Prokuroria firmos 5 urdhër arreste
• Ukraina i quan gjenocid sulmet ruse ndaj rrjetit të energjisë elektrike