Policia britanike arreston pesë persona të dyshuar për terrorizëm

Policia britanike arrestoi pesë burra, përfshirë katër shtetas iranianë, nën dyshimin për planifikim të kryerjes së akteve terroriste, njoftoi sot shërbimi për shtyp i policisë.

Arrestimet u kryen në Londër, Swindon dhe zonën e Madhe të Mançesterit dhe lidhen me dyshimet për planifikim të mundshëm të një sulmi ndaj një objekti specifik. Burrat, të moshës midis 29 dhe 46 vjeç, u arrestuan me dyshimin për përgatitjen e një akti terrorizmi dhe po mbahen në paraburgim, sipas një deklarate nga policia e Londrës, raporton e përditshmja “The Guardian”, duke shtuar se kombësia e njërit prej të arrestuarve është ende duke u përcaktuar.

Njësia policore kundër terrorizmit kontaktoi vendndodhjen që dyshohet se ishte cak i sulmit me qëllim që të informonte njerëzit e pranishëm rreth kërcënimit dhe t’u ofronte atyre këshilla dhe mbështetje të përshtatshme, por për arsye operacionale vendndodhja e saktë nuk u njoftua.

Policia thotë se hetimi po zhvillohet me shpejtësi dhe se po bashkëpunon ngushtë me njerëzit në zonën e prekur për t’i informuar ata.

Hetimi është ende në fazat e hershme. Po hetojmë rrugë të ndryshme për të përcaktuar motivet e mundshme, si dhe nëse ka rrezik shtesë për publikun që lidhet me këtë rast. “Ne e kuptojmë që publiku është i shqetësuar dhe i nxisim të gjithë të qëndrojnë vigjilentë dhe të na kontaktojnë nëse shohin ose dëgjojnë diçka që i shqetëson”, tha policia.

Deklarata konfirmoi se policia po kryen kërkime në disa adresa në zonat e Greater Manchester, Londër dhe Swindon në lidhje me këtë hetim.