Policia për vrasjen në Shkodër: Viktima u nxor në pritë, pse e ekzekutoi Arjon Hasa

Drejtoria Vendore e Policisë Shkodër ka mbajtur një komunikatë lidhur me ngjarjen e ndodhur në fshatin Dragoç të Shkodrës më datë 5 janar 2025, ku u vra me armë zjarri Ramazan Mataj.

Pas njoftimit për ngjarjen e ndodhur, policia ka shkuar në vendngjarje dhe në vijim, ka shoqëruar në ambientet e Policisë shumë persona, për t’i pyetur në lidhje me ngjarjen.

Si rezultat i hetimeve kanë bërë të mundur arrestimin e autorit të dyshuar Arjon Hasa për vrasjen e Ramazan Mataj, si dhe të vëllait të autorit Klisman Hasa si bashkëpunëtor.

Konferenca e mbajtur nga Policia Shkodër:

Drejtoria Vendore e Policisë Shkodër, menjëherë pas njoftimit për ngjarjen e ndodhur në fshatin Dragoç, ngriti një grup të posaçëm hetimor dhe së bashku me shërbime të shumta të Policisë së Shkodrës, të Forcës Kombëtare të Sigurisë Njësia Shkodër dhe të Drejtorisë për Kufirin dhe Migracionin Shkodër, shkuan në vendin e ngjarjes.

Shërbimet e Policisë, pas veprimeve të shpejta në vendin e ngjarjes, shoqëruan në ambientet e Policisë, shumë shtetas, për t’i pyetur në lidhje me ngjarjen.

Nga hetimet rezultoi se shtetasi Arjon Hasa, 29 vjeç, banues në Dragoç, për motive të dobëta, ka organizuar dhe ka kryer vrasjen e shtetasit Ramazan Mataj. 29-vjeçari, nëpërmjet llogarive të rreme në rrjete sociale, ka komunikuar me shtetasin Ramazan Mataj, për ta nxjerrë në pritë në fshatin Dragoç, ku dhe dyshohet se e ka vrarë.

Gjithashtu, nga hetimet dyshohet se shtetasi Ramazan Mataj kishte ndikuar për prishjen e marrëdhënieve bashkëshortore të motrës së autorit. Autori i dyshuar është ndihmuar nga vëllai i tij, shtetasi Klisman Hasa, për sigurimin e kushteve për të kryer vrasjen dhe për të fshehur armën e krimit.

Si rezultat i kontrolleve u bë e mundur gjetja e armës së zjarrit me të cilën dyshohet se autori ka kryer vrasjen. Pas krimit, dy vëllezërit e fshehën armën në një zonë të pyllëzuar dhe më pas e groposën në tokë në oborrin e banesës.

Në përfundim të hetimeve u bë arrestimi i shtetasve: Arjon Hasa, për veprat penale “Vrasja me paramendim” dhe “Prodhimi dhe mbajtja pa leje e armëve, armëve shpërthyese dhe municionit luftarak”; dhe arrestimi i Klisman Hasa, për veprën penale “Sigurimi i kushteve dhe mjeteve materiale për të kryer vrasje”.