Porosia erdhi nga jashtë vendit, kush është i arrestuari për vrasjen në Vlorë

Një prej autorëve të dyshuar të përfshirë në vrasjen e 58-vjeçarit, Renato Hoxhaj, në Vlorë është arrestuar ditën e martë në qytetin e Tiranës.

Burime për Euronews Albania bëjnë me dije se janë zhvilluar dy aksione të rëndësishme për kapjen e auorëve të atentatit, një në Tiranë dhe tjetri në Ksamil. Në Tiranë është arrestuar një person i identifikuar si Erlis Mehmetaj, i cili dyshohet se ka ndihmuar autorin e krimit.

Ai nuk ka qenë ekzekutori, por dyshohet se ka luajtur një rol të rëndësishëm në ndihmën për realizimin e vrasjes. Gjatë këtij operacioni janë shoqëruar disa persona të tjerë, një prej të cilëve është transferuar në Vlorë për t’u marrë në pyetje.

Policia ka rënë në gjurmët e autorit përmes mjetit të përdorur në krim. Makina, e cila kishte targa të ndryshuara, rezultoi të ishte në pronësi të personit të ndaluar. Ky detaj ka ndihmuar hetuesit në avancimin e hetimeve.

Ndërkohë, në Ksamil janë zhvilluar kontrolle nga forcat RENEA dhe FNSH, ku janë shoqëruar disa persona, por deri më tani nuk rezulton që ata të kenë lidhje me ngjarjen. Kontrollet janë kryer pasi dyshohet se ekzekutori është larguar jashtë vendit, në drejtim të Greqisë.

Dyshohet se vrasja është kryer me pagesë dhe se është porositur nga jashtë vendit.

Një nga pistat e hetimit lidhet me ekzekutimin nga një grup mafioz, pasi dyshohet se Hoxhaj ishte informator i grupit rival që e ekzekutoi.

Hetuesit kanë sekuestruar telefonin e Mehmetaj dhe pritet ekspertiza për të hedhur më shumë dritë mbi ngjarjen.

LEXONI GJITHASHTU:

• Zbardhet vrasja e rojës në Vlorë, Karamuço: Ja pse u ekzekutua 58-vjeçari
• Vrasja e 58-vjeçarit në Vlorë, kamerat filmuan autorin, 2 pistat ku po hetohet